Brixton Moord en Roof Orkes

Die Brixton Moord & Roof Orkes was 'n Afrikaanse rock band wat van 1999 tot aan die begin van 2008 bestaan het. Hul musiek is al beskryf as "tragiesmooi", "true school", "hardekoejawel-rock" en "kind of like Koos du Plessis had he ever heard Nirvana". Die band se songs word gekenmerk deur skerp lirieke en musiek wat wissel van harde rock tot melancholiese folk. Hul lirieke handel oor alledaagse onderwerpe soos drank, dwelms, misdaad, road rage, oorlog, en hulle het selfs 'n love song.

Tydens hul bestaan het die band twee CD's vrygestel.  Spergebied, die band se eerste CD, is in 2002 vrygestel. Hul tweede CD, Terug in skubbe, is in 2004 deur Rhythm Records vrygestel. Beide CD's is deur Paul Riekert opgeneem en het rave reviews in die media gekry.

Moord Greeff, ook bekend as Ockert Greeff en voormalige drummer van die Brixton Moord en Roof Orkes, saam met sy bruid Elizabeth Araujo in die strate van Montreal.

Resensies van Roof se digbundel Retoer begin verskyn. Lees 'n resensie deur Louise Viljoen op LitNet, Mariana Malan s'n in Die Burger, Jo Prins s'n in Beeld, Melt Myburgh in Rapport en Loftus Marais in Boeke-Insig.

Die Metropolisie het voormalige lede van die Brixton Moord en Roof Orkes, wat nou gereeld saam met Bacchus Nel optree, se toerusting gekonfiskeer by die Bohemian in Richmond, Johannesburg. Hulle het die toerusting weer teruggekry, maar nie in die toestand wat dit was voor die konfiskasie nie. Lees die storie in Beeld.

Hierdie digter/sanger en dosent in Sosiologie het veral bekendheid verwerf as lid van die rockgroep Brixton Moord en Roof Orkes en vir sy rubrieke op LitNet en in Rapport. Sy debuutbundel sal beslis aanklank vind by die geslag Afrikaanssprekende mans wat diensplig moes doen en worstel met hulle hierwees in Afrika. Die verse is uiters toeganklik en spreek vele sosiale kwessies aan.
'n Sterk bewustheid van die geskiedenis van Suid-Afrika kenmerk die gedigte in Retoer. Die breë verloop van die geskiedenis kry 'n persoonlike kleur deur die bytrek van sy eie voorgeslagte en deur die aanvaarding van 'n lotsverbondenheid met sowel die voorgeslagte as tydgenote, dié wat "in Angola en in Wimpy Bars moes vrek".
In talle gedigte is reise ter sprake: reise in die verlede soos dié van die Europese immigrante na die land, die reise van die Voortrekkers die binneland in, van mynwerkers na Johannesburg, van plattelanders na groot stede; ook dié van dienspligtiges na die buurland Namibië en van emigrante na lande soos Kanada en Australië. Telkens word daar egter teruggekeer na die twee groot stede Pretoria en Johannesburg. Bezuidenhout slaag daarin om die moeisaamheid, somberheid en selfs uitsigloosheid van 'n kleinburgerlike bestaan in die stad te verwoord, maar bowenal om die menslike gesig van die stede ook na vore te bring.
Die gedigte in die vyf afdelings van Retoer is oop en toeganklik en roep 'n wêreld op wat vir die meeste Afrikaanse lesers herkenbaar behoort te wees. Met vrae soos "Skepe van ver het ons hier gelaat;// sal 'n vliegtuig ons eendag kom haal?" en verwysings na die verskansings wat min skuiling teen misdadigers bied, sluit Bezuidenhout aan by die aktualiteit en openbaar hy 'n sterk sosiale bewussyn. Die vervlegtheid van 'n aantal deurlopende temas, waarvan die belangrikste die afwagting op die oordeel van die "Kaptein" is, maak van Retoer 'n heg gestruktureerde bundel wat 'n besondere leeservaring vir die leser bied. [Protea Boekhuis, R120]
- Protea Boekhuis Nuusbrief.

Die Brixton Moord & Roof Orkes by die opname van 'n video vir "Vis", die title track op Terug in skubbe. Foto: Mariska Ison.

Die band bedank almal hartlik wat Sondag 14 Oktober in die Bohemian was vir die opname van 'n video vir "Vis" van die album Terug in skubbe. Hulle betuig ook hul meegevoel met Bacchus Nel en Frits Blitz weens die verlies van hul kitare en klanktoerusting, wat voor die venue gesteel is. Lees meer oor die tragedie in Beeld.

“Hoekom is wiegeliedjies altyd so grafies? Dalk is dit omdat die babas nie kan verstaan wat vir hulle gesing word nie.” Mariana Malan van Die Burger het 'n onderhoud met Roof gedoen toe hy die Kaap tydens die Versindaba besoek het. Lees die artikel hier.

Die Brixton Moord & Roof Orkes kondig met leedwese aan dat hulle afskeid neem van hulle tromspeler en stigterslid Moord Greeff. Moord het aangekondig dat hy aan die begin van Augustus vir 'n "onbepaalde tyd" na Montreal in Kanada verhuis.

Sy plek sal voortaan gevul word deur Andrew Evans, wat al as tromspeler vir Plank, Miss September en Bacchus Nel opgetree het. Hy was ook onlangs in aksie saam met Paul Riekert, Piet Botha, Marcel van Heerden, Brixton Barnard, Esmé Evakwaad en 'n aantal ander kunstenaars in 'n huldeblyk aan wyle Johnny Cash. Andrew sal in die orkes se tradisie voortaan as Moord Evans bekendstaan.

Dankie vir die organiseerders van die STRAB festival by Ponta Malongane in die Suide van Mosambiek! Dit was die naweek van 24 tot 27 Mei. Dis die eerste keer wat die Brixton Moord & Roof Orkes daar op die verhoog geklim het. Gaan kyk by www.strab.co.za vir foto's en 'n link na Roof se rubriek in Rapport oor die festival. Beplan solank vir volgende jaar!